På Husfliden i Bergen er alt det lyse kardefloret utsolgt – iallefall var det tomt på laurdag.
Arne og Carlos har skapt ei dille, og me kastar oss på.
Ein av medlemmane våre har tjuvstarta, og melder at det går best med trepinnar nr 2,5.
Ho har også brukt over 30 gram ull i kvar kule for å få dei faste nok.
Julemøtet er onsdag 24. november. Ta med (finull)garn og pinnar.
Me har ikkje arbeidskveld på lagsrommet onsdag 17. november.
Då tek me med oss eit handarbeid til De Heibergske samlinger i Kaupanger.
Der er det kaffi og kaker, andre indresogningar med sine arbeid, og noko å lære om gamal teknikk av damene i bunadnettverket.
Blir du med?
Det gjekk fint i år også!
Det var masse fine strikka varer på messa vår – og ikkje så veldig mykje anna.
Jau , forresten – det var jo baksten som var viktigast: Årdalskling, sunnfjordkling
og kransekaker. Det utgjorde meir enn halve omsetnaden vår!
Og så var der litt trearbeid
- som mange gjerne skulle hatt – om dei hadde hatt ein plass til det, sa dei.
Vakker porselensmåling var der også -
og røffare betong til ulike høve.
Me kallar det ikkje ei julemesse tidleg i november – men nissar var der no likevel.
Fine, er dei ikkje?
Den 17. november er det duka for ny temakveld på museet.
Sogn bunadnettverk er i full gang med førebuingar til kvelden, så det er berre å begynne å glede seg til nok ein spennande kveld.
Tema denne gongen er “perlenett på tekstil”.
Tru om det kan vere noko slikt som dette?
Biletet av jentebora er lånt frå Magasinet Bunad.
Det er enklast å skildre teknikken som hekling gjennom stoff. På oversida ser det ut som kjedesting. Kanskje er det også derfor at musea kringom ofte ikkje veit om at dei har tamburerte gjenstandar i magasina - ikkje før dei har hatt Else Johnsrud på vitjing.
Teknikken kom eigentleg frå Kina, fortel Siri, og den har fleire fordeler. Arbeidet veks mange gonger så raskt, stinga blir jamnare, og det er enkelt å rekke opp om det trengst. Kjedesaumen kom til Europa på 1400-talet, og vart helst brukt av kyrkje og adel. Då tambureringa kom på 1700-talet, spreidde den seg raskt til alle samfunnslag.
Siri hadde med seg ferdige arbeid, påbegynte arbeid, og nokre oppspente råmer som me kunne prøve oss på. Ein interessant og litt annleis kveld for alle som møtte. Tusen takk, Siri!
