Messehelg

Me gjer som me pleier:

Dampar, fester trådar, merker og prisar.

I kveld riggar me lokalet, tek imot produsentane og registrerer varene deira. Me ser til at alt vert pent lagt fram, og at alle får passe mykje plass. Lotterigevinstane skal stillast pent ut, og boka gjerast klar. Loddsal i tre timar!

Så går me heim og førebur dagen i morgo med kakebakst, og ser fram til årets messedag.

Det er fire messer i Øvre denne dagen. Korleis slår det ut, tru?

Fornying

Me har vore heldige!



Gamle, skakke vevstolar har sin sjarm – heilt til ein skal veve noko i dei.
Over sommaren har me skifta ut ein av dei gamle vevstolane med ein nesten ny – ei gåve til laget.



For ein månads tid sidan var leiar og sekretær i fin driv med montering av det ny vidunderet. Den store vevboka låg oppe på rette sida, bitane smatt fint saman – men så mangla det litt.
Ein manglande bom og nokre kilar stoppa oss der og då. I dag sette me saman resten.



Me har planar om ringvend, og treng berre dei fire skafta som stod i no.



Men vidunderet har ti skaft og trøer, kontramarsj og det heile. Her kan me veve oss lekker dreiel seinare.
Om ein liten månad startar me opp att aktiviteten på tysdagane.

Smøyg på museet

 

Det er så fin stemning desse handarbeidskafekveldane på museet.

Gjensynsgleda er stor – mange fjes går igjen frå gong til gong, og dei kjem frå heile indre Sogn.

Siri er eit grundig og engasjert tekstilmenneske, og ho er ein god formidlar. Me sat fengsla medan tida flaug.

Spennet i uttrykk frå silke på lin -

til ull på lin, er stort.

   

I andre deler av landet har også smøygbroderia vore meir fargeglade og leikne.

Me lærte at smøyg er ein eldgamal teknikk. Den er veldig økonomisk, for lite av den farga brodertråden ligg på baksida av arbeidet. Det meste ligg på framsida, og ein fester også trådendane der. Symbolbruken er viktig, i tilleg til det reint dekorative.

Me fekk også eit innblikk i Siri sitt arbeid med Huldreduken. Dette håpar me å få følgje etter som det skrid fram.

Tusen takk til Sogn bunadnettverk for nok ein triveleg og lærerik kveld på museet.